In Mehlmeißel
Gschbräch am Nämbercher Chrisdkindlersmarggd
Nach am halbn Meder Worschd
hosdd an saubrudooln Dorschd
nix wäi hiie zum Glühweinschdand
und zwaa Dässla bis zum Rand
vullgmachd midd däm schäiner Gsäff
bläddsli schdäihd vur dir: dei Scheff!
„Wos dännern Sie am Glühweinschdand
Mensch, Sie woarn heid morng doch grangg
Fieber, Husdn und di Gribbn
edds schdänners dou näiber där Gribbn
und zäihng a Schöbbla Glühwein nei
däs is a Riesen-Schweinerei:
Grangg sei und in Glühwein saufn
bsuffn nacherd hammwärds laafn
koddsn nebern Kichnschrangg:
Und morng sämmer widder grangg!“
„Scheff, däs is a Missverschdändnis!
Ich setze Sie hiermit in Kenntnis:
Frischlufd hodd nu kaan wos gschadd
und dou gibbds kaan Widderbadd
Schbaziergäng ghärn hald aa dazou
und edds lässd mer schäi mei Rouh
sunsd gäih iich morng fräih aff di Kur
mach viärzeäh Dooch a Wellness-Duur
wall mei Böörn-Aud is brudool
drum hald di Waffl, dschegg und zoahl:
Dringgsd a Schöbbla Glühwein midd
und nou sämmer widder gwidd
nou dreff mer si morng im Büro
und bingdli bin i morng Fräih doo!
Odder bausd edds weider Schdress
nou kummi ned – wäi schmeggdern däs?
Nach kurzer und reiflicher Überlegung erfolgt die Antwort des Chefs:
„Also goud, kumm schdouß mer ooh
dringg mer nu an Glühwein doo
nacherdla gäihd jäider hamm
und morng Fräih ärber mer zamm!“
Aus dem Büchlein "Gsachd is gsachd!"
Die Story vom Christbaum
Z´ärschd wärder irchärdwou im Schdeggerlaswald gschdulln
affs Audu draffgschnalld
– odder a neigwärchd –
nacherdla schdäihder viärzeh Dooch
ziddernd in der Käldn drassn
dass däi Noodln glabbern häärsd
wäi bei am Skeledd di Gnochn.
Bläddsli fallns iiber ihn her
midd di Waffn
midd dänners sunsd
hächsdns nu Indionerless schbülln dänna:
Z´lang suller sei
und däi diggn Äsdla schdärn aanu
haxdnern nou a Schdiggla ooh
aff där Derrassn
gibbds a Gwärch
wallsd agrood di schänsdn Zweichla
därwischd hosdd
und scho hosdd in grässdn Schdreid
wäicher däm Gribbl
där suwisuu ball kanne Noodln mehr hodd.
Där glaa Gwaxer hodd aa schu anne gfangd
waller beim Sääng
in Baam ned richdi ghaldn hodd
und di Mudder hulld awall is Bflasder.
Hosddnern dann endli in sei Schdänderkorseddla neizwängd
wärder neidroong
midd där Schbidds z´ärschd
und wennsder di Noodlschbuur oohschausd
wassd a glei
wos dei Ärberd is
di näxdn boar Wuchn:
Am besdn du schdellsd in Schdaabsaacher glei midd daneem!
Wäier suu an seim Bläddsla schdäihd
kännsd maana
dasser drassn im Wald
eicherdlich vüll schänner ausgschaud hodd
– där Baam –
odder wos davuu nu iibri is.
Noja, nou schmiggmern hald
und scho hosdd widder dei Gfredd:
Kummd edds a Lammedda hie – odder ned?
Sänn di Kugln ned zu grouß?
Schmiggmern heid midd Schdernla blouß
bunde Schleifla – Schdrouhhalmkeddn
wäi iichs mach – dou dou iich weddn
bassd däs meim glann Schäddlsa ned:
Und däs is is grässde Gfredd !
Inzwischn wärds ball dungl drassn
dei Gschengla hosdd immanunedd eibaggd
daffier schdäihd där Baam
– odder wos davuu nu iibri is –
abber z´vull därfer aaned wärn:
Nimmsdnern hald widder wech – dän Schdern!
Eddsadla schauder a goar nämmer su drauri aus
und dassd agrood di schänsdn Zweichla
oohgsäächd hosdd
schdärd a ka alde Sau mehr
där glaa Gwaxer greind nämmer
di Mudder hodd si hergrichd affn Glanz
dassders middm Baam verwechsln kännsd
blouß noodln douds nunned su arch
abber ihre Hoar gliddsern scho aweng asuu
wäi leddsds Joahr is Lamedda.
Ganz dungl wärds bläddsli im gschmiggdn Zimmer
und di Mudder hoggd si vuurs Glawier:
„Vadder, zind di Kerzn ooh !“
aus "Walls worschd is!"
Hier geht´s zur nächsten Seite
(Das politische Gedicht)