Gschbräch mid anner Kundin im Hugendubel
Neili woari widder Moal im Hugendubel im Nämbercher-Franggn-Cender. Där Hugendubel is a grouße
Buchhandlung, abber däs wassd ja suwisuu.
Und dou gibbd aa fasd alle Bäicher vu miär zu kaafn.
Alsu, ich gäih in dän Loadn nei und wos siechi dou?
Direggd vuur miär, am Gschdell midd meine Bäicher, schdäihd a Fraa und liesd indressierd in meim Bouch „Bläid gloffn!“.
Iich alsu nix wäi hiie zu dära Fraa und schbrechs aa glei direggd ooh.
Ich (grinsend): „Däs is a gouds Bouch, däs „Bläid gloffn!“, däs känners mer glaam. Wergli dodool lusdich!“
Fraa (neugierig): „Wiesuu, hommsis scho gleesn?“
Ich (laut lachend): „Naa, gleesn ned, abber gschriem!“
Bause. Längere Bause. Ganz lange Bause.
Die Fraa schaud mi ungläubich oh, nacherdla dräihsd is Bouch rum und sichd mei Konderfei aff där
Bouchrüggseidn, wäi i aus der Ridderrüsdung nausschaua dou.
Fraa (verblüfft und fassungslos): „Doodsächli, Sie sänns wergli! Däs sänn Sie! Wäi gibbdsnern
suuwos?“
Ich (erklärend und auf hochdeutsch): „Ich bin der Autor dieser Bücher und habe gerade neue
Bücher als Nachschub angeliefert.“
Fraa (schnauft erleichtert durch): „Ach suu, desweeng. No, aff jäidn Fall moui däs Bouch kaafn,
edds woui in Audor aanu bersönli kenn! Däädn Sie miär däs Bouch aa signiern?“
Ich zäich mein Kuchlschreiber aus där Daschn und grixl glei direggd im Loadn wos Nedds nei:
„Viel Glück“ oder suu und mei Underschrifd middsamdn Dadum dazou.
Und wos machdn di Fraa nacherdla?
Däi bedanggd si, nimmd mei Bouch und gäihd damidd schurschdraggszur Kassn hiie und zoahld.
Und wos denggimer? Dreimoal därfsd roadn!
Subber! Widder aans verkaffd!
Und hier sind zwei weitere Kostproben aus dem nächsten Buch "Aweng mehr därfs scho sei!"
Einschdellungsgschbrääch
Ein junger Mann spricht bei einem Apotheker wegen einer Anstellung als
Kurierfahrer vor. Folgendes kurze Gespräch findet statt:
Apotheker: „Stellen Sie sich zuerst einmal bitte vor. Wie heißen Sie?“
Junger Moh: „Iich bin där Andi.“
Apotheker: „Ach so, der Andi. Andi – und wie sonst noch? Wie lautet denn Ihr
Nachname?
Junger Moh: „Biodikum.“
Apotheker (klatscht sich ans Hirn): „Ach so, Sie sind der Andi Biotikum. Wie
passend. Gut, Sie sind eingestellt.“
Där Quarggwiggl
Wassd du, wos is besde an am „Quarkwickel“ (Quarggwiggl) is? Ned? Ward iich
verroads där. Is besde an am „Quarggwiggl“ is, dasser ka „Retterspitzwickel“
(Redderschbiddswiggl) is, wall där suugenannde Redderschbiddswiggl hald vüll
ärcher schdinggn doud wäi sua Quarggwiggerla.
Däs is ja aa vu Haus aus suu gloar wäi Gloußbräih, wall hald in am
Redderschbiddswiggerla vüll mehr Zoudoodn drinna sänn wäi in am aafachn
Quargwiggerla, nämli is Thymolöl, Kamillenextrakt, Pfefferminze, Rosmarin,
Eukalyptus und Olivenöl.
Und im Quarggwiggl is hald blouß nu där Quargg.
Und außerdem hassds desweeng ja aa: „Edds reed kan suan Quargg daher“ und
ned „Edds reed hald kan suan Redderschbidds“ daher.
Hobbla, edds hobbi mi gedanggli dodool vergallobbierd. Wos willin edds
iiberhabbds aussoong?
Also, där Quarggwiggl där räichd zwoar aa aweng säuerlich, abber ned goar suu
schdreng wäi sei Kummbl, där Redderschbiddswiggl.
Abber däs wissmer ja scho.
Dafür bröggld där Redderschbiddswiggl ned suu arch wäi is Quarggwiggerla,
wennsdnern a Schdund lang um dei Knäi gwiggld hossd. Däsweeng haaßn ja alle
Zwaa „Wiggerla“, wallsders um dei Knäi wiggln dousd.
Abber däs wissmer aa scho.
Hobbla, edds hobbi mi gedanggli numool dodool vergallobbierd. Wos willin edds
iiberhabbds aussoong?
Alsu folchndes:
Iich hobb a kabudds Knäi und mach desweeng hald abwechslnd beide Wiggerla.
Nach am Quarggwiggerla folchd a Redderschbiddswiggerla und danooch widder a
Quarggwiggerla.
Bisd middkumma?
Hobbla, edds hobbi mi gedanggli numool dodool vergallobbierd. Wos willin edds
iiberhabbds aussoong?
Hald edds fälldsmer widder ei!
Sachd nämli mei Fraa, wäi i mer widder a Wiggerla, worschd welch´s, gmachd
hobb, zu miär:
„Du Gustav, eicherdli mäißerdn miä weecher dänna vülln Wiggl, däi du immer
machn dousd, ned in Barthelmesaurach sondern in Wicklesgreuth wohna.“
Anmerkung: Wicklesgreuth is a Ordschafd im Landkreis Ansbach und lichd bei Petersaurach.
Hier geht´s zur nächsten Seite: